Punimet e asfaltimit kanë nisur në segmentin rrugor të kyçjes në Mazgit. Këtë e bëri të ditur ministri në detyrë i Infrastrukturës dhe Transportit, Dimal Basha, pas një inspektimi në vendngjarje.
Ndërhyrja ka si qëllim përmirësimin e sigurisë së qarkullimit në këtë pjesë të rrugës. Sipas Bashës, gjendja e rënduar e rrugës ka detyruar institucionet të ndërhyjnë me një sanim të përkohshëm. Kjo zgjidhje do të jetë në fuqi derisa të kryhen analizat e nevojshme për problemet që lidhen me ujërat nëntokësore, të cilat po dëmtojnë trupin e rrugës.
Ministri tha se punimet po zhvillohen sipas planifikimeve. Segmenti rrugor pritet të rihapet për qarkullim pas orës 17:00 të ditës së sotme. Vendosja e sinjalizimit horizontal do të ekzekutohet gjatë fundjavës.
Basha falënderoi qytetarët për mirëkuptimin gjatë realizimit të punimeve në këtë segment.