Prokuroria e Posaçme (SPAK) dha detaje nga arrestimi i Adi Çobos. Në momentin e ndalimit, Çobo mbante një pistoletë automatike me dy karikatorë dhe katër dokumente të falsifikuara, përfshirë një kartë identiteti dhe patentë italiane. Këto elemente sugjerojnë lëvizje të shpeshta dhe lidhje me Italinë, sipas SPAK.
Arrestimi, i realizuar nga Byroja Kombëtare e Hetimit (BKH) në bashkëpunim me Qendrën Operative DIA të Barit, ndodhi në kuadër të një skuadre të përbashkët hetimore mes SPAK dhe Drejtorisë Antimafia të Barit. I dyshuari u dërgua në paraburgimin e Durrësit, në pritje të procedurave të ekstradimit.
Çobo kërkohej në kuadër të operacionit ndërkombëtar “Ura”, i zhvilluar më 21 maj 2025 nga autoritetet shqiptare, italiane dhe belge. Ky operacion çoi në ekzekutimin e 52 urdhërarresteve dhe sekuestrimin e pasurive në Shqipëri dhe Itali, me vlerë miliona euro, lidhur me trafik ndërkombëtar narkotikësh dhe pastrim parash. Hetimet u shtrinë në Durrës dhe qytete italiane pasi disa shtetas shqiptarë i shpëtuan fazës fillestare të operacionit. Çobo u lokalizua në lagjen e tij në Shkozet, një qendër kryesore e grupit kriminal Troplini-Doçi, që vepronte mes Pulias, Shqipërisë dhe Holandës. SPAK thekson se procedurat janë ende në fazën e hetimit paraprak.