Dy kandidatët për deputetë nga PDK, Bekim Haxhiu dhe Qëndrim Kryeziu, i janë drejtuar Supremes pas refuzimit të kërkesës së tyre nga PZAP për rinumërim votash. Ankesa e tyre bazohet në fakte të reja, që sipas tyre, dëshmojnë parregullsi të konsiderueshme gjatë procesit të numërimit.
Bekim Haxhiu theksoi se ankesa mbështetet në raportin e Sekretariatit të Komisionit Qendror të Zgjedhjeve, i cili evidenton gabime në numërimin fillestar në Qendrën e Numërimit dhe Rezultateve. Ai shprehu pritjen që Gjykata Supreme të urdhërojë rinumërimin, duke theksuar rëndësinë e votës së qytetarëve.
Përveç ankesës së PDK-së, edhe Lista Serbe ka dorëzuar një ankesë në Gjykatën Supreme, duke pretenduar parregullsi në shpërndarjen e votave për partinë e Nenad Rashiqit. Gjithashtu, dy ankesa janë dërguar nga Nova Demokratska Stranka (NDS) e Emilja Rexhepit, njëra kundër partisë së Rashiqit dhe tjetra ndaj Koalicionit Vakat.
Ligji për Zgjedhjet e Përgjithshme përcakton një afat prej pesë ditësh për Gjykatën Supreme për të marrë një vendim mbi këto ankesa. Vendimi i Supremes do t'i hapë rrugë certifikimit të rezultateve përfundimtare të zgjedhjeve të 7 qershorit.
Kryeministri në detyrë, Albin Kurti, ripërsëriti se bisedimet për formimin e institucioneve të reja do të nisin vetëm pas certifikimit të rezultateve.