Ndeshja ishte dramatike, me Anglinë që luajti edhe me 10 lojtarë. Që në minutën e parë, Declan Rice u ndëshkua me karton të verdhë. Anglia kaloi në epërsi në minutën e 36-të, kur Bukayo Saka asistoi për Bellingham, i cili shënoi me kokë. Vetëm dy minuta më vonë, Bellingham shënoi edhe golin e dytë personal, duke dyfishuar avantazhin në 2-0.
Meksika reagoi shpejt, duke ngushtuar shifrat në minutën e 42-të me Julian Quinones. Pjesa e dytë nisi me një moment kyç në minutën e 53-të, kur Jarell Quansah u ndëshkua me karton të kuq direkt pas një ndërhyrjeje të rrezikshme, vendim i konfirmuar nga VAR-i. Pavarësisht inferioritetit numerik, Anglia fitoi një penallti në minutën e 58-të, të cilën Harry Kane e shndërroi në gol për rezultatin 3-1.
Meksika nuk u dorëzua dhe shënoi sërish në minutën e 68-të me Raul Jimenez nga pika e bardhë, pas një tjetër ndërhyrjeje të verifikuar nga VAR. Deri në fund, vendasit ushtruan presion të madh, por mbrojtja angleze rezistoi, duke mbajtur rezultatin 3-2 edhe pas 11 minutash shtesë. Në çerekfinale, Anglia do të përballet me Norvegjinë më 11 korrik në Miami.