Gjykata Speciale, Dhomat e Specializuara për Kosovën, ka vendosur që shpallja e aktgjykimit për Hashim Thaçin, Kadri Veselin, Jakup Krasniqin dhe Rexhep Selimin të bëhet më 16 shtator të këtij viti. Kjo shtyrje e datës u justifikua me kompleksitetin e madh të çështjes dhe sasinë e gjerë të provave.
Trupi Gjykues ka marrë dëshmi nga 270 dëshmitarë, ka pranuar 5467 prova materiale, dhe transkriptet e gjykimit përbëhen nga 29.238 faqe. Gjykata theksoi se kjo zgjatje ishte e nevojshme për të garantuar një vlerësim tërësor dhe të drejtë të provave, si dhe për të përgatitur një arsyetim të saktë me shkrim. U sqarua se periudha e pushimeve të gjykatës nuk ndikoi në caktimin e datës së re.
Nga ana tjetër, disa avokatë e vlerësojnë shtyrjen të paarsyeshme, duke argumentuar se trupi gjykues kishte kohë të mjaftueshme. Artan Qerkini theksoi shkeljen e parimit të gjykimit brenda afatit të arsyeshëm, ndërsa Skënder Musa sugjeroi rishqyrtimin e masës së paraburgimit për të akuzuarit.
Ish-krerët e UÇK-së akuzohen për krime lufte dhe krime kundër njerëzimit. Ata janë në paraburgim që nga viti 2020, ndërsa gjykimi nisi në prill të vitit 2023. Zyra e Prokurorit të Specializuar ka kërkuar burgim prej 45 vjetësh për secilin nga të akuzuarit, ndërsa avokatët mbrojtës kanë kërkuar lirimin e tyre.