Shumica e institucioneve shtetërore në këto vende nuk kanë rregulla specifike nëse nëpunësit publikë mund të përdorin AI gjatë punës së tyre, si dhe nuk mbajnë evidencë për përdorimin e këtyre mjeteve. Kjo situatë krijon rreziqe për mbrojtjen e të dhënave personale dhe sigurinë e informacionit, pasi mungojnë masat teknike për të parandaluar futjen e dokumenteve zyrtare ose të dhënave të qytetarëve në platformat e AI.
Disa institucione e pranojnë se punonjësit e tyre përdorin AI për të hartuar dokumente, përkthyer tekste, korrigjuar shkrime, kryer detyra administrative dhe analizuar të dhëna. Megjithatë, të gjitha institucionet bien dakord se mungon një kuadër ligjor i posaçëm për përdorimin e AI.
Enes Çengiq, ekspert gjyqësor i teknologjisë së informacionit në Bosnje dhe Hercegovinë, thekson se AI nuk mund të ndalohet, por duhet rregulluar me ligj. Ai paralajmëron se të dhënat e futura në platformat e AI mund të ruhen dhe rikuperohen, ndaj kërkohet kujdes nga përdoruesit.
Në ndryshim nga vendet e Bashkimit Evropian, të cilat kanë filluar zbatimin e Aktit për Inteligjencën Artificiale (AI Act), vendet e Ballkanit Perëndimor janë ende në fazën e hartimit të ligjeve dhe strategjive për përdorimin e AI. BE-ja ka vendosur rregulla të rrepta për sigurinë, transparencën dhe menaxhimin e të dhënave.
Në Kosovë, ndonëse nuk ka një ligj të posaçëm për AI, Strategjia për e-qeverisje 2023-2027 parashikon përfshirjen e AI në digjitalizimin e shërbimeve publike. Institucionet kosovare po punojnë për të përafruar rregullat me standardet e BE-së, duke përfshirë vlerësimin e gatishmërisë për harmonizim me AI Act dhe GDPR.